Syair Aceh : Manfaat ASI

    MANFAAT ASI

Ngon rahmat Tuhan Yang Maha Tinggi
Beureukat neu bri keu hamba dumna
Seulaweut saleum keupada Nabi
Ureung peuturi Aleh deungon Ba

Wareh ngon sahbat meuhat lom lagi
Karong ngon Wali dumna syaidara
Gampong ngon peukan sama sekali
Saleum kamoe bri ngon lapang dada

Neu sambot saleum wahe dum akhi
Ngon dada leupi jaro ban dua
Laen bak saleum na chit kamo bri
Teuntang ASI kamo calitra

Air Susu Ibu geusingkat ASI
Makanan bayi yang that sempurna
Leupah that peunteng kamoe peuturi
Manfaat ASI keu aneuk ban na

Seubab lawetnyo deungo hai akhi
Le that dum bayi ie mom jih hana
Rame takalon dum kawom ummi
Han geubri ASI keu aneuk ban na

Geu tem blo susu geubri keu bayi
Padahai ASI leubeh le guna
Meu kaleng-kaleng susu geu cari
Geujok keu bayi ban teubleut mata

Hana geupike meu ube sawi
Manfaat ASI hana geu kira
Peurintah Tuhan tan geu padoli
Wajeb bri ASI keu aneuk ban na

Diphon ban lahe sampo ban janji
Geu yu bri ASI keu aneuk gata
Dua thon umum wahe dum ummi
Keupada bayi bri mom le gata

Anugrah Tuhan didalam ASI
Tuboh bayi keubai ji teuka
Le that vitamin Tuhan neubri
Di dalam ASI wahe kawom ma

Neu deungo jino kamo peurinci
Manfaat ASI Tuhan karonya
Meunyo aneuk mit ka jimom ASI
Tuboh bayi sehat ji teuka

Reujang that rayeuk, aneuk Tuhan brie
Meunyo ASI geubri le poma
Gaseh meu ikat meuhat hai ummi
Gata ngon bayi gaseh setia

Poma pih aman hana that a’i
Seubab bayi makanan kana
Ho yang geujak hana le sangsi
Meunan hai ummi kayem yang kaka

Beulanja irit han peu tacari
Meunyoe tatem brie ASI hai poma
Cukop vitamin di dalam ASI
Cukop ngon gizi wahe kawom ma

Laen nibaknyan teuma hai akhi
Makanan tabri keu aneuk gata
Makanan tambahan meunan geurasi
Wate bayi 6 buleun usia

Umu nam buleun makanan tabri
Supaya bayi sehat ji teuka
Yang laen-laen han peu padoli
Cukop lam ASI vitamin kana

Bek le neu mayeum wahe hai ummi
Peulom lagi Pergub jih kana
Meunyoe kon tanyoe yang tem paduli
Keu geunerasi Aceh Mulia

Sep keuh dile peusan kamo bri
Teuntang ASI wahe kawom ma
Laen ta sambong hai bungong giri
Baca hai akhi lon lake gisa....

 

Jangan pernah ragu untuk menyusui bayi, karena selain membuat ikatan batin semakin dekat antara ibu dgn si bayi, juga terhindar dari kanker, ternyata menyusui dpt mengembalikan bobot tubuh sebelum kehamilan. sebab menyusui bisa membakar kalori 3000 kalori perhari. Sayang Bayi, Beri ASI .....

👁 1484 kali

Berita Terkait